Sinopsis

Eguneroko hizkeran aski zabaldutako terminoa bihurtu da «diskurtsoa»: politikari batek jendaurrean emandako diskurtsoaz mintzo gara, edo diskurtso arrazistak sustatzen dituzten alderdiei buruz. Ohartzen gara erabiltzen dugun hizkuntza, neurri handi batean, bizitzea egokitu zaigun garaiaren eta bertan indarrean dauden harreman sozial eta politikoen sintoma dela. Baina nola aztertu edo frogatu dezakegu lengoaiaren eta fenomeno sozialen arteko harremana?
Erantzuna Diskurtsoaren Analisian egon daiteke. Hizkuntzalaritzako tresnak Gizarte Zientzien eremura ekarriz, hizkuntzak errealitatea modulatzeko dituen hainbat moduri erreparatzen dio hark. Adibidez betetako kontakizun ulerterraz baten bidez, liburu honek Diskurtsoaren Analisiarekiko lehenbiziko hurbilketa bat eskaintzen die gai horrekiko interesa duten ikasle, ikertzaile zein irakurle arruntei. Bertan topatuko dituzte diziplinaren jatorriari eta ikergaiei buruzko nondik norakoak, autore nagusien hainbat ekarpen euskaratuta, tresna teoriko zein metodologiko esanguratsuak eta aplikazio praktiko batzuk, irakurlea hizkuntzaren aurpegi sozialari buruz hausnartzera gonbidatzeko asmoz.