Sinopsis

Informatikariek eta software-garatzaileek esfortzu izugarria eskaintzen diote kode-garapenari; hartara, ezinbesteko dute kodea txukun, garbi eta seguru garatzea ahalbidetuko dieten tresnak ezagutzea eta erabiltzea. Git software-bertsioak kontrolpean izateko sistemarik ezagunena eta erabiliena dugu egun, eta erabiltzen ikasteko praktika behar bada ere, etorkizunean ordainetan ematen dituen onurak eta abantailak oso nabariak dira. Eskuliburu honen helburua ez da Git guztiz deskribatzeko idazlan astun bat izatea, baizik Git erabiltzeko nagi den hura motibatzeko, oinarrizko kontzeptuak erakusteko eta etorkizun hurbilean izango dituen arazoak konpontzen laguntzeko gida bat izatea. Eskuliburu hau bidelagun duela irakurleak bere kodetzeko gaitasunak gorengo maila batera eramatea lortuko du.